Ntdujt

Klaar gebakte Buchteln

Buchteln (ook: Wuchteln, Ofennudeln of Rohrnudeln in Beiere en die Palts, soms ook Einback genoem) is 'n soort soet gebak ("Germknödel") wat van gisdeeg berei en voor die bakproses in kluitjies gevorm word. Buchteln, wat met of sonder vulsel bedien word, is 'n tipies Boheemse gereg wat ook ingang tot die Saksiese, Swabiese, Beierse en Oostenrykse kookkuns gevind het.

Die Oostenrykse en Boheemse variant word dikwels met 'n vulsel van Powidl (pruimpuree), papawersaad, kwark of appelkooskonfyt geniet, in Beiere daarnaas ook dikwels met rosyntjies, Powidl of vars pruime. As Weense spesialiteit word vyf Buchteln voor die bakproses tot 'n kring met 'n bol in die middel saamgevoeg. Ná die bakproses word versiersuiker oor die gebak gestrooi. Weense Buchteln word warm bedien. Buchteln word dikwels met warm vanieljesous bedien. In sommige streke word Buchteln ook sonder vulsel gebak en met suurkool geniet.

Die term Dukatenbuchteln verwys na 'n variant wat - sodra dit klaar gebak is - so groot soos 'n eier is.

In die kookkuns van Bo-Silesië word Buchteln van dieselfde deeg soos Dampfnudeln berei en op 'n doek in die stoomkamer van 'n kookpot gaargemaak. Silesiese Buchteln word tradisioneel met bloubessie- of braambessiekompot geniet.

Eksterne skakels[wysig | wysig bron]

• Metode en geskiedenis van Suid-Tiroolse Buchteln (de)
• A Story from Slovakia: Cultural Meanings of Hot Buchticky (en)